Itsasotik platerera: Sukaldaritza Zuzendaritzako 1. mailako taldeek Getariako bihotza ezagutu dute
Joan den ostiralean, martxoak 13, Sukaldaritza Zuzendaritzako 1. mailako (A eta D) taldeek ikasgelak utzi eta Getariako portura joan ziren. Hazik antolatutako irteera tekniko honi esker, gure etorkizuneko profesionalek lehen sektorearen errealitatea ezagutu ahal izan zuten, funtsezko alderdia baita haien prestakuntza gastronomikoan.
Eguna Kofradia-Basque Food proiektuari buruzko hitzaldi batekin hasi zen; baxurako arrantza eta hurbileko produktua balioesten dituen ekimena, hain zuzen. Ondoren, ikasleek arrain-lonja bisitatu zuten. Bertan, enkanteen funtzionamendua ikusi eta ontzietatik deskargatu berri diren antxoa-kaxak bertatik bertara ikusteko aukera izan zuten. Gainera, saregileak lanean ikusteko pribilegioa izan zuten, arrantza-sareak josten eta konpontzen dituzten emakumeen artisau-ofizioa ezagutuz.
Bisitari amaiera emateko, taldea herriko kontserba-lantegi batera joan zen. Bertan, antxoa gatzetan jartzeko prozesu osoa erakutsi zieten. Esperientzia guztiz praktikoa izan zen, zenbait ikaslek euren antxoa-latak prestatu baitzituzten, gure sukaldean hain preziatua den produktu hau tratatzeko beharrezko teknika ikasiz.